ಆದಿಯಲಿ ಜಿನನಿಲ್ಲ | ವೇದದಲಿ ಹುಸಿಯಿಲ್ಲ | ವಾದದಿಂದಾವ ಧನವಿಲ್ಲ ಸ್ವರ್ಗದಿ | ಮಾದಿಗರೆ ಇಲ್ಲ ಸರ್ವಜ್ಞ ||

ಕುಲವಿಲ್ಲ ಯೋಗಿಗಂ | ಛಲವಿಲ್ಲ ಜ್ಞಾನಿಗಂ | ತೊಲೆ ಕಂಭವಿಲ್ಲ ಗಗನಕ್ಕೆ ಸ್ವರ್ಗದಲಿ | ಹೊಲಗೇರಿಯಿಲ್ಲ ಸರ್ವಜ್ಞ ||

ಗುರುವಿನಾ ಸೇವೆಯನು | ಹಿರಿದಾಗಿ ಮಾಡದಲೆ | ಹರಿದಾಡಿ ಮುಕ್ತಿ ಪಡೆಯುವಡೆ ಸ್ವರ್ಗ ತಾ | ಹಿರಿಯ ತವರಹುದೆ ಸರ್ವಜ್ನ್ಯ ||

ಜಾಣೆಯಾ ನುಡಿ ಲೇಸು | ವೀಣೆಯಾ ಸ್ವರ ಲೇಸು | ಮಾಣದಲೆ ವದನ ಶುಚಿ ಲೇಸು | ಕೂರ್ಪವರ | ಕಾಣುವದೆ ಲೇಸು ಸರ್ವಜ್ಞ ||

ತಂದೆ-ತಾಯಿಗಳ ಘನ | ದಿಂದ ವಂದಿಸುವಂಗೆ | ಬಂದ ಕುತುಗಳು ಬಯಲಾಗಿ ಸ್ವರ್ಗವದು | ಮುಂದೆ ಬಂದಕ್ಕು ಸರ್ವಜ್ಞ ||

ಬಟ್ಟನಾಗಿಯೇ ಬೊಟ್ಟ | ನಿಟ್ಟು ಒಪ್ಪುವ ಜೈನ | ನೆಟ್ಟಗೇ ಸ್ವರ್ಗ ಪಡಿಯುವಡೆ ಸಾಣೇಕಲ್ | ಕೆಟ್ಟ ಕೇಡೇನು ಸರ್ವಜ್ಞ ||

ಬೆಂಕಿಯಲಿ ದಯೆಯಿಲ್ಲ | ಮಂಕನಲಿ ಮತಿಯಿಲ್ಲ | ಶಂಖಧ್ವನಿಗೆ ಪ್ರತಿಯಿಲ್ಲ ಸ್ವರ್ಗದಿ | ಸುಂಕದೇ ಇಲ್ಲ ಸರ್ವಜ್ಞ ||

ಹಾರುವರು ಎಂಬವರು | ಹಾರುವರು ನರಕಕ್ಕೆ | ಸಾರದ ನಿಜವನರಿಯದಿರೆ ಸ್ವರ್ಗದಾ | ದಾರಿಯ ಮಾರ್ಗಹುದೆ ಸರ್ವಜ್ಞ ||

ಹಾರುವರು ಸ್ವರ್ಗದ | ದಾರಿಯನು ಬಲ್ಲರೇ | ನಾರಿ ಪತಿವ್ರತದಿ ನಡೆಯೆ ಸ್ವರ್ಗದಾ | ದಾರಿ ತೋರುವಳು ಸರ್ವಜ್ಞ ||