ಅಕ್ಕರವ ಕಲಿತಾತ | ಒಕ್ಕಲನು ತಿನಗಲಿತ | ಲೆಕ್ಕವನು ಕಲಿತ ಕರಣಿಕನು ನರಕದಲಿ | ಹೊಕ್ಕಾಡ ಕಲಿತ ಸರ್ವಜ್ಞ ||

ಅಕ್ಕಸಾಲಿಗನೂರಿ | ಗೊಕ್ಕಲೆಂದೆನಬೇಡ | ಬೆಕ್ಕು ಬಂದಿಲಿಯ ಹಿಡಿದಂತೆ ಊರಿಗವ | ರಕ್ಕಸನು ತಾನು ಸರ್ವಜ್ಞ ||

ಅಕ್ಕಿಯನು ಉಂಬುವನು | ಹಕ್ಕಿಯಂತಾಗುವನು | ಸಿಕ್ಕು ರೋಗದಲಿ ರೊಕ್ಕವನು ವೈದ್ಯನಿಗೆ ಇಕ್ಕುತಲಿರುವ ಸರ್ವಜ್ಞ ||

ಅಂಗಿ ಅರಿವೆಯ ಮಾರಿ | ಭಂಗಿಯನು ತಾ ಸೇದಿ | ಮಂಗನಂದದಲಿ ಕುಣಿವಾತ ಭವ - ಭವದಿ | ಭಂಗಗೊಳುತಿಹನು ಸರ್ವಜ್ಞ ||

ಅಡರಿ ಮೂಡಲು ಮಿಂಚು | ಪಣುವಣ್ಗೆ ಧನುವೇಳೆ | ಬಡಗಣದ ಗಾಳಿ ಕಡುಬೀಸೆ ಮಳೆಯು ತಾ | ತಡೆಯದಲೆ ಬಕ್ಕು ಸರ್ವಜ್ಞ ||

ಅಡ್ಡಬದ್ದಿಯು ಹೊಲ್ಲ| ಗಿಡ್ಡ ಬಾಗಿಲು ಹೊಲ್ಲ | ಹೆಡ್ಡರೊಡನಾಟ ಕೆರೆಹೊಲ್ಲ ಬಡಿಗ ತಾ| ರೊಡ್ಡನಿರ ಹೊಲ್ಲ ಸರ್ವಜ್ಞ ||

ಅಂದಿನಾ | ಪುಷ್ಪದತ್ತ || ಬಂದ ವರರುಚಿಯಾಗಿ ಮುಂ ದೇವಸಾಲೆ ಸರ್ವಜ್ಞ - ನೆಂದೆನಿಸಿ ನಿಂದವನು ತಾನೇ ಸರ್ವಜ್ಞ

ಅರಿಯ ದೆಸಗಿದೆ ಪಾಪ | ಅರಿತರದು ತನಗೊಳಿತು | ಅರಿತರಿತು ಮಾಡಿ ಮರೆತವನು ತನ್ನ ತಾ | ನಿರಿದುಕೊಂಡಂತೆ ಸರ್ವಜ್ಞ ||

ಅರಿವಿನಾ ಅರಿವು ತಾ | ಧರಯೊಳಗೆ ಮೆರೆದಿಹುದು | ಅರಿವಿನಾ ಅರಿವಹರಿವಹರಿಹರರು ಬೊಮ್ಮನೂ | ಅರಿಯರೈ ಸರ್ವಜ್ಞಾ ||

ಅವರೆಂದರವನು ತಾ | ನವರಂತೆ ಆಗುವನು | ಅವರೆನ್ನದವನು ಜಗದೊಳಗೆ ಬೆಂದಿರ್ದ | ಅವರೆಯಂತಕ್ಕು ಸರ್ವಜ್ಞ ||

ಅಷ್ಟದಲ ಕಮಲವನು | ಮೆಟ್ಟಿಪ್ಪ ಹಂಸ ತಾ | ಮುಟ್ಟಿಪ್ಪ ಗತಿಯನರಿಯದಾ ಯೋಗಿ ತಾ | ಕೆಟ್ಟನೆಂದರಿಗು ಸರ್ವಜ್ನ್ಯ ||

ಅಳಿವಣ್ಣದಾಕಾಶ | ಗಿಳಿವಣ್ಣದಾ ಮುಗಿಲು | ಅಳಿದಳಿದುಮರ್ಕ ನುದಯಿಲು ಮಳೆಯು ತಾ | ಘಳಿಲನೇ ಬಕ್ಕು ಸರ್ವಜ್ಞ ||

ಆಗಲೇಳು ಸಾಸಿರವು | ಮುಗಿಲು ಮುಟ್ಟುವಕೋಟೆ | ಹಗಲೆದ್ದು ಹತ್ತು ತಲೆಯಾತ ಪರಸತಿಯ | ನೆಗೆದು ತಾ ಕೆಟ್ಟ ಸರ್ವಜ್ಞ ||

ಆಡದಲೆ ಮಾಡುವನು | ರೂಢಿಯೊಳಗುತ್ತಮನು | ಆಡಿ ಮಾಡುವನು ಮಧ್ಯಮನು | ಅಧಮ ತಾ | ನಾಡಿ ಮಾಡದವ ಸರ್ವಜ್ಞ ||

ಆಡಿ ನಳ ಕೆಟ್ಟ ಮ | ತ್ತಾಡಿ ಧರ್ಮಜ ಕೆಟ್ಟ | ಕೂಡಿದ ನಾಲ್ವರೂ ತಿರಿದುಂಡರೆ ನೆತ್ತವ | ನಾಡಬೇಡೆಂಬ ಸರ್ವಜ್ಞ ||