ಎಲ್ಲವರು ಹಿರಿಯವರು | ಬಲ್ಲವರು ಗುರು ಅವರು ನಲ್ಲಳುರೆ ಮುಂದೆ ಸುಳಿದರೇ ಲೋಕದೊಳ | ಗೊಲ್ಲದವರಾರು ಸರ್ವಜ್ಞ ||

ಎಲ್ಲಿ ನೋಡಿದಡಲ್ಲಿ | ಟೊಳ್ಳು ಜಾಲಿ ಮುಳ್ಳು | ಉಳ್ಳವರು ಎಲ್ಲ ಕಿಸವಾಯಿ ಬಡಲಾ | ತಳ್ಳಿ ಬೇಡೆಂದ ಸರ್ವಜ್ಞ ||

ಎಳ್ಳು ಗಾಣಿಗಬಲ್ಲ | ಸುಳ್ಳು ಶಿಂಪಿಗ ಬಲ್ಲ | ಕಳ್ಳರನು ಬಲ್ಲ ತಳವಾರ ಬಣಜಿಗನು | ಎಲ್ಲವನು ಬಲ್ಲ ಸರ್ವಜ್ಞ ||

ಏಡಿಯೇರಲು ಗುರುವು | ನೋಡೆ ಕಡೆ ಮಳೆಯಕ್ಕು | ನಾಡೊಳಗೆಲ್ಲ ಬೆಳೆಯಕ್ಕು ಪ್ರಜೆಗಳು | ಈಡೇರಲಕ್ಕು ಸರ್ವಜ್ಞ ||

ಏನು ಮನ್ನಿಸದಿರಲು | ಸೀನು ಮನ್ನಿಸಬೇಕು | ಸೀನು ಮನ್ನಿಸದೆ ಹೋಗಿಹರೆ ಹೋದಲ್ಲಿ | ಹಾನಿಯೇ ಬಕ್ಕು ಸರ್ವಜ್ಞ ||

ಏರುವಾ ಕುದುರೆಯನು | ಹೇರುವಾ ಎತ್ತನ್ನು | ಬೇರೂರಲಿದ್ದ ಸತಿಯನ್ನು ಬೇರೋಬ್ಬ | ಸೇರದೇ ಬಿಡರು ಸರ್ವಜ್ಞ ||

ಒಕ್ಕಲಿಕ ನೋದಲ್ಲ | ಬೆಕ್ಕು ಹೆಬ್ಬುಲಿಯಲ್ಲ | ಎಕ್ಕಿಯಾ ಗಿಡವು ಬನವೆಲ್ಲ ಇವು ಮೂರು | ಲೆಕ್ಕದೊಳಗೆಲ್ಲ ಸರ್ವಜ್ಞ ||

ಒಕ್ಕಲಿಲ್ಲದ ಊರು | ಮಕ್ಕಳಿಲ್ಲದ ಮನೆಯು | ಲೆಕ್ಕವಿಲ್ಲದವನ ಬೇಹಾರ ಇವು ಮೂರು | ದು:ಖ ಕಾಣಯ್ಯ ಸರ್ವಜ್ಞ ||

ಒಚ್ಚೊತ್ತು ಉಂಬುವದು | ಕಿಚ್ಚತಾ ಕಾಯುವದು | ಬೆಚ್ಚನಾ ಠಾವಿಲೋಗಿದರೆ ವೈದ್ಯನಾ | ಕಿಚ್ಚಲಿಕ್ಕೆಂದ ಸರ್ವಜ್ಞ ||

ಒಡಲ ಹಿಡಿದಾಡದಿರು | ನುಡಿಯ ಹೋಗಾಡದಿರು | ನಡೆಯೊಳೆಚ್ಚರವ ಬಿಡದಲಿರು ಪರಸತಿಯ | ಕಡೆಗೆ ನೋಡದಿರು ಸರ್ವಜ್ಞ ||

ಒಡಲನಡಗಿದ ವಿದ್ಯೆ | ನಡೆದೊಡನೆ ಬರುತಿರಲು ಒಡಹುಟ್ಟಿದವರು ಕಳ್ಳರೂ ನೃಪರೆಂದು ಪಡೆಯರದನೆಂದ | ಸರ್ವಜ್ಞ ||

ಒಣಗಿದಾ ಮರ ಚಿಗಿತು | ಬಿಣಿಲು ಬಿಡುವುದ ಕಂಡೆ | ತಣಿಗೆಯಾ ತಾಣಕದು ಬಹುದು ಕವಿಗಳಲಿ ಗುಣಯುತರು ಪೇಳಿ ಸರ್ವಜ್ಞ ||

ಒಂದನ್ನು ಎರಡೆಂಬ | ಹಂದಿ ಹೆಬ್ಬುಲಿಯೆಂಬ | ನಿಂದ ದೇಗುಲದ ಮರವೆಂಬ ಮೂರ್ಖ ತಾ | ನೆಂದಂತೆ ಎನ್ನಿ ಸರ್ವಜ್ಞ ||

ಒಂದರಾ ಮೊದಲೊಳಗೆ ಬಂದಿಹುದು ಜಗವೆಲ್ಲ | ಒಂದರಾ ಮೊದಲನರಿಯುವಡೆ ಜಗ ಕಣ್ಣು | ಮುಂದೆ ಬಂದಿಹುದು ಸರ್ವಜ್ಞ ||

ಒಂದು ಒಂಭತ್ತು ತಲೆ | ಸಂದ ತೋಳಿಪ್ಪತ್ತು | ಬಂಧುಗಳನ್ನೆಲ್ಲ ಕೆಡಿಸಿತು ಪತಿವ್ರತೆಯ | ತಂದ ಕಾರಣದಿ ಸರ್ವಜ್ಞ ||