ಪಲ್ಲಕ್ಕಿ ಏರಿದವ | ರೆಲ್ಲಿಂದ ಬಂದಿಹರು | ನೆಲ್ಲಕ್ಕಿಯಂತೆ ಸುಲಿವಲ್ಲ ಹಿರಿಯರುಂ | ನೆಲ್ಲಳಿಂದಲೇ ಸರ್ವಜ್ಞ ||

ಪವನಪರಿಯರಿದಂಗೆ | ಶಿವನ ಸಾಧಿಸಲಕ್ಕು | ಭವಮಾಲೆ ಹರಿದು ಸುಖಿಸುವೊಡೆ ಅವ ಸದಾಶಿವನು ತಾನಕ್ಕು ಸರ್ವಜ್ಞ ||

ಪಾಪ - ಪುಣ್ಯಗಳೆಂಬ | ತಿಣ್ಣ ಭೇದಗಳಿಂದ | ತಣ್ಣಗೀ ಜಗವು ನಡೆದಿಹುದು ಅಲ್ಲದಡ | ನುಣ್ಣಗಾಗಿಹುದು ಸರ್ವಜ್ಞ ||

ಪೀಠ ಮೂಢಗೆ ಹೊಲ್ಲ | ಕೀಟ ನಿದ್ದೆಗೆ ಹೊಲ್ಲ | ತೀಟಿಯದು ಹೊಲ್ಲ ಕಜ್ಜಿಯಾ ದುರ್ಜನರ | ಕಾಣವೇ ಹೊಲ್ಲ ಸರ್ವಜ್ಞ ||

ಪುಣ್ಯತನಗುಳ್ಳ ನರ | ಮನ್ನಣೆಯು ಪಿರಿದಕ್ಕು | ಹಣ್ಣಿರ್ದ ಕಾರ್ಯ - ಫಲವಕ್ಕು ಹಿಡಿದಿರ್ದ | ಮಣ್ಣು ಹೊನ್ನಕ್ಕು ಸರ್ವಜ್ಞ ||

ಪುಲ್ಲೆ ಚರ್ಮವನುಟ್ಟು | ಹುಲ್ಲು ಬೆಳ್ಳಗೆ ಬಿಟ್ಟು ಕಲ್ಲು ಮೇಲಿಪ್ಪ ತಪಸಿಯ ಮನವೆಲ್ಲ | ನಲ್ಲೆಯಲ್ಲಿಹುದು ಸರ್ವಜ್ಞ ||

ಪುಷ್ಪ ವಿಲ್ಲದ ಪೂಜೆ | ಅಶ್ವವಿಲ್ಲದ ಅರಸು | ಒಪ್ಪಲೊಲ್ಲವಳ ನಗೆನುಡಿಯು ಇವು ಮೂರು | ಚಪ್ಪೆ ಕಾಣಯ್ಯ ಸರ್ವಜ್ಞ ||

ಪ್ರಸ್ತಕ್ಕಿಲ್ಲದ ಮಾತು | ಹತ್ತು ಸಾವಿರ ವ್ಯರ್ಥ | ಕತ್ತೆ ಕೂಗಿದರೆ ಫಲವುಂಟು ಬರಿಮಾತು | ಕತ್ತೆಗಿಂ ಕಷ್ಟ ಸರ್ವಜ್ಞ ||

ಪ್ರಸ್ತಕ್ಕೆ ನುಡಿದಿಹರೆ | ಬೆಸ್ತಂತೆ ಇರಬೇಕು | ಪ್ರಸ್ತವನು ತಪ್ಪಿ ನುಡಿದಿಹರೆ | ನಡುಬೆನ್ನಿ ನಸ್ತಿ ಮುರಿದಂತೆ ಸರ್ವಜ್ಞ ||

ಪ್ರಸ್ತಾಪಕೊದಗಿದಾ | ಕತ್ತೆ ಮದಕರಿಯಂತೆ | ಪ್ರಸ್ತಾಪತೀರ್ಥ ಮರುದಿನಾ ಮದಕರಿಯು | ಕತ್ತೆಯಂತಕ್ಕು ಸರ್ವಜ್ಞ ||

ಬಗೆಬಗೆಯ ಭೋಗವಿರೆ | ನಗುತಿಹರು ಸತಿ ಸುತರು | ನಗೆ ಹೋಗಿ ಹೋಗೆಯು ಬರಲವರು ಅಡವಿಯಲಿ | ಒಗೆದು ಬರುತಿಹರು ಸರ್ವಜ್ಞ ||

ಬಟ್ಟನಾಗಿಯೇ ಬೊಟ್ಟ | ನಿಟ್ಟು ಒಪ್ಪುವ ಜೈನ | ನೆಟ್ಟಗೇ ಸ್ವರ್ಗ ಪಡಿಯುವಡೆ ಸಾಣೇಕಲ್ | ಕೆಟ್ಟ ಕೇಡೇನು ಸರ್ವಜ್ಞ ||

ಬಟ್ಟಲದ ಬಾಯಂತೆ | ಹುಟ್ಟುವದು ಲೋಕದೊಳು | ಮುಟ್ಟದದು ತನ್ನ ಹೆಂಡಿರನು ಕವಿಗಳಲಿ | ದಿಟ್ಟರಿದ ಪೇಳಿ ಸರ್ವಜ್ಞ ||

ಬಟ್ಟೆ ಬಟ್ಟೆಯೊಳೆಲ್ಲ | ಹೊಟ್ಟೆ ಜಾಲಿಯ ಮುಳ್ಳು | ಹುಟ್ಟಿದವರೆಲ್ಲ ನಿಜವಾಯಿ ಮೂಡಲ | ಬಟ್ಟೆ ಬೇಡೆಂದ ಸರ್ವಜ್ಞ ||

ಬಡವ ಬಟ್ಟೆಯ ಹೋಗ | ಲೊಡನೆ ಸಂಗಡಿಗೇಕೆ ? ಬಡತನವು ಎಂಬ ಹುಲಿಗೂಡಿ ಬರುವಾಗ | ನುಡಿಸುವವರಿಲ್ಲ ಸರ್ವಜ್ಞ ||