ಕಷ್ಟಗಳು ಓಡಿಬರ | ಲಿಷ್ಟಕ್ಕೆ ಭಯವೇಕೆ | ಶಿಷ್ಟಂಗೆ ತೊದಲು ನುಡಿಯೇಕೆ | ಕಳ್ಳಂಗೆ ದಟ್ಟಡಿಯದೇಕೆ ಸರ್ವಜ್ಞ ||

ಕಳ್ಳಿ ನಾರಿಗೆ ಹೊಲ್ಲ | ಮುಳ್ಳು ಕಾಲಿಗೆ ಹೊಲ್ಲ | ಕೊಳ್ಳಿ ಬೆಳಕಿನೊಳು ಉಣಹೊಲ್ಲ ಬಡವ ತಾ | ಸುಳ್ಳಾಡ ಹೊಲ್ಲ ಸರ್ವಜ್ಞ ||

ಕಾಣಿಸಿರುವಂತವನ | ಕಾಣದೇಕಿರುವಿರೋ | ಕಾಣಲು ಬಿಡಲು ಕರ್ಮಗಳು ನಿನ್ನಿರವ | ಆಣೆ ಇಟ್ಟಿಹವು ಸರ್ವಜ್ಞ ||

ಕಾದ ಕಬ್ಬುನವು ತಾ | ಹೊಯ್ದೊಡನೆ ಕೂಡುವದು | ಹೋದಲ್ಲಿ ಮಾತು ಮರೆದರಾ ಕಬ್ಬುನವು | ಕಾದಾರಿದಂತೆ ಸರ್ವಜ್ಞ ||

ಕಾಯವಿಂದ್ರಯದಿಂದ | ಜೀವವಾಯುವಿನಿಂದ | ಮಾಯೆಯದು ಬೊಮ್ಮನಿಂದೆಂಬುವಾ ನಾಯ | ಬಾಯಿ ನೋಡೆಂದ ಸರ್ವಜ್ಞ ||

ಕಾಲು ಮುರಿದರೆ ಹೊಲ್ಲ | ಬಾಲೆ ಮುದುಕಗೆ ಹೊಲ್ಲ | ನಾಲಿಗೆಯಲೆರಡು ನುಡಿ ಹೊಲ್ಲ | ಸಮರದಲಿ ಸೋಲುವಡೆ ಹೊಲ್ಲ ಸರ್ವಜ್ಞ ||

ಕಾಲುಂಟು ನಡೆಯದದು | ಮೂಲೆಯಲಿ ಕಟ್ಟಿಹುದು | ಬಾಲಕರ ಸೊಮ್ಮು ಹೊರತಿಹುದು ಕವಿಗಳಲಿ | ಬಾಲರಿದ ಪೇಳಿ ಸರ್ವಜ್ಞ ||

ಕಿಚ್ಚುಂಟು ಕೆಸರುಂಟು | ಬೆಚ್ಚನಾ ಮನೆಯುಂಟು | ಇಚ್ಚಗೇ ಬರುವ ಸತಿಯುಂಟು | ಮಲೆನಾಡ ಮೆಚ್ಚ ನೋಡೆಂದ ಸರ್ವಜ್ಞ ||

ಕಿರಿಮೀನು ಹಿರಿಮೀನು | ಕೊರೆ ತರೆದು ತಿಂಬಾತ ಗಿರುವವನು ಒಬ್ಬ ಮಗಸಾಯ ನೋವಿನಾ | ತೆರನ ತಾನರಿವ ಸರ್ವಜ್ಞ ||

ಕಿರಿಯಂದಿನಾ ಪಾಪ | ನೆರೆ ಬಂದು ಹೋದೀತೆ | ಅರವಿಂಗೆ ಹಿರಿದು ಕಿರಿದಿಲ್ಲ ಇದನು ನೀ | ನರಿದು ನೋಡೆಂದ ಸರ್ವಜ್ಞ ||

ಕುಡಿವ ನೀರನು ತಂದು | ಅಡಿಗೆ ಮಾಡಿದ ಮೇಲೆ | ಒಡನುಣ್ಣದಾಗದಿಂತೆಂಬ ಮನುಜರ್‍ಅ | ಒಡನಾಟವೇಕೆ ಸರ್ವಜ್ಞ ||

ಕುತ್ತಿಗದು ಹರಿದಿಹುದು | ಮತ್ತೆ ಬರುತರೇಳುವದು | ಕಿತ್ತು ಬಿಸುಡಲು ನಡೆಯುವದು ಕವಿಜನರ | ಅರ್ತಿಯಿಂ ಪೇಳಿ ಸರ್ವಜ್ಞ ||

ಕುಂದಳಿದವ ದೈವ | ಬಂಧ ಕಳೆದವ ದೈವ | ನೊಂದು ತಾ ನೋಯಿಸದವ ದೈವ ಹುಸಿಯದನೆ | ಇಂದುಧರನೆಂದ ಸರ್ವಜ್ಞ ||

ಕುಂಭಕ್ಕೆ ಗುರು ಬರಲು | ತುಂಬುವವು ಕೆರೆ - ಭಾವಿ | ಅಂಬರದ ತನಕ ಬೆಳೆಯಕ್ಕು ಲೋಕಕ್ಕೆ | ಸಂಭ್ರಮಕ್ಕು ಸರ್ವಜ್ಞ ||

ಕುರಿಯನೇರಲು ಗುರುವು | ಧರೆಗೆ ಹೆಮ್ಮೆಳೆಯಕ್ಕು | ಪರಿಪರಿಯ ಧಾನ್ಯ ಬೆಳೆಯಕ್ಕು ಪ್ರಜೆಗಳೆಗೆ | ಕರೆಯಲ್ಹಯನಕ್ಕು ಸರ್ವಜ್ಞ ||